oben im Bild: Sandra Keck und Sophie

De plattdüütsch Spraak is en uroolt Kulturgoot, un dat mööt wi plegen. Plattdüütsch schall leven un mutt höört un snackt warrn. Sophie vun de föffte Klass, Annika vun de sövente Klass snackt villicht nich so goot Platt, aver lesen köönt se dat bannig goot.

An’n Sünndag, den 25. Junimaand güng dat in’t Ohnsorg-Theater to’n 18. Mal dor üm, bi den Leeswettstriet „Jungs un Deerns leest Platt“ de besten Lesers ut ganz Hamborg ruttofinnen.Up de grote Bühn, vör noch grötter Publikum un en hoochkarätig Jury hebbt de drei Kinners vun uns School, de leest hebbt, gode Nerven wiest un jüm ehr Texten as de Profis vördragen. Vun 31 Scholen sünd 45 Schoolsiegers (Jungs un Deerns) mellt worden, un 16 dorvun hebbt na en Twüschenentscheed in’t Ohnsorg-Theater mitmaken dröfft, wo in enkelte Öllersgruppen de besten Hamborger Plattlesers küürt worden sünd.

En Smustern kunn een sik nich verkniepen, as Sophie mit veel Körperinsatz un deftige Slääg up dat Lesepult dorstell, dat een Mügg, nich grötter as en Muuskötel, en Minsch so kujoneern kann dat he op Jagd gohn muss.

Annika hett mit veel Hartbloot verklort, datt se lever en Kolibri as en Schildkrööt sien mach, ok wenn se denn nich dreehunnert Johr oolt waart. Nee, segg se, denn lever rumflarren, von Blööd to Blööd den Nektar sugen; denn lever nich so lang, doch vull Höög un Möög.

Johanna hett en Geschicht vun Matthias Stöhrwoldt leest, de as Jungkeerl up’n Lannen sien leve Noot dormit harr, alle Dörpslüüd to gröten. De wullen jümmers grööt warrn – egal wo faken een dat al an’n Dag daan harr. Dor kunn denn Tante Karin al mol to en „Alte Schnepfe“ warrn.

Annika hett in er Altersklass wunnen! Dat is verdeent wen, dat se wunnen hett, un se is in’t Hamborger Raathuus inlaadt, wo in’n November en Fest to den Leeswettstriet fiert warrt.

1999 is Plattdüütsch in de „Europäische Charta der Regional- oder Minderheitensprachen“ upnahmen worden. Ok dorüm gifft sik Hamborg Möh, dörch düssen Leeswettstriet „Jungs un Deerns leest Platt“ de plattdüütsch Spraak ünner de Arms to griepen. Dat Alexander-von-Humboldt-Gymnasium, dat mit dree Bezirkssiegers bi de besten Hamborger Lesers vertreden wesen is, nimmt düsse Upgaav eernst – dat hebbt wi nu sehn!

Düsse Veranstaltung to’n Afsluss, de jümmers goot besöcht is un goot bi dat Publikum ankummt, hett Gerrit Hoß musikalisch ümrahmt, un Sandra Keck vun’t Ohnsorg-Theater, dat sik düchtig üm düssen Wettstriet kümmert, hett modereert.

© 2017 Hy